Pacific Voyager Forum

American Samoa => Visitor's Fale - Amerika Samoa => Topic started by: Tavita Tusitala on April 30, 2009, 03:06:25 PM

Title: Saunoaga o le Fu’a Kovana Togiola Tulafono ’A’ai o Ta’aloga a Fitaf Flag Day
Post by: Tavita Tusitala on April 30, 2009, 03:06:25 PM
Saunoaga o le Fu’a 2009
Kovana Togiola Tulafono
Aperila 17, 2009 - ’A’ai o Ta’aloga a Fitafita Tuai
Tafuna, Amerika Samoa

Talofa Tutuila ma Manu’a.
Talofa i le mamalu ma le pa’ia o malo vala’aulia, ma le atunu’u ua potopoto. Ou te fa’atalofa atu. Ua fetalai le Fofoga o le Aso e paepae upu o le taeao. Taeao manuia. Taeao toto’a. Taeao manino.
Ua i lagi le inatisa e pei ona si’itaulaga le ositaulaga o le aso – Le Afioga Moseniolo Etuale Lealofi. E le fa’aitiitia ai le fa’amanu, le fa’afetai, ma le fiafia e ao ina taulagi pea – mai ia te a’u le ta’ita’i, fa’apea tupu ma e’e ma e o nofopule i tulaga ese’ese o lo ta Malo.
E le fou le Sisigafu’a ia Tutuila ma Manu’a. A o aso uma fa’apenei, tatou te potopoto ai e molimau i fa’aaliga va’aia o le fou pea o fa’amanuiaga a le Atua i si o tatou atunu’u, mai le tasi Sisisgafu’a i le isi. E moni lava e molimau le tasi taeao i le tasi taeao, ma le tasi aso i le tasi aso. Ua tatou se’ei pea i maota o manu ma ’oa’oa i Lana fa’asoa alofa. O le mea lea, le atunu’u e, ’aua lava ne’i galo se mea e tasi o Ana meaalofa, pe fa’aitiitia lau fa’amanu.
Fa’afetai i le pa’ia maualuga o le ’auvala’aulia ua afifio mai e fa’amalumalu lo tatou aso fa’apitoa – le Afioga i le Ali’i Palemia o le Malo o Samoa Tuto’atasi – Tuilaepa Sailele Malielegaoi, le Afioga i le Purinisese o Tonga Salote Mafile’o Pilolevu Tuita, le Afioga i le Ulu o Tokelau Foua Toloa ma le faletua ia Fesola’i Logo Faletoese Toloa,  le Afioga i le Ali’i Palemia o le Malo o le Atu Kuki Jim Marurai, le Afioga i le Ali’i Minisita o Fa’ato’aga, Vaomatua, Faiga Faiva, Falemeli ma Feso’ota’iga o le Malo o Niue Pokotoa Sipela, le Afioga i le Hai Komesina o Niu Sila i Samoa Caroline Bilkey, le Afioga ia Lady Ala’ile’ula Tuku’aho o Tonga, ma sui maualuluga o vaega’au a le Unaite Setete – le Ami (Army), le Coast Guard, le Malini (Marines),  le Neivi (Navy), le fa’aili pu ta’uta’ua a le Malini – le Marine Pacific Forces Band, ma la tatou lava fa’aili pu ta’uta’ua mai Samoa – le fa’aili a Leoleo, le Royal Samoa Police Band, ma le aufa’afiafia mai Samoa i le Afio’aga o Falelauvao ma le Afio’aga o Satitoa. Fa’afetai le fa’aloalo, fa’afetai le fa’aeaea, fa’afetai le fia fai uso ia Amerika Samoa. Fa’afetai tele lava.
O le aso lenei e taula’i ai finagalo i mataupu tau lo tatou Malo, tatou te manatunatu ai i la tatou folauga, e toe sasa’a ai le fafao ma timata le upega, e mata’i ai le launiu i ulula, ma le alava’a po o taumuatonu lo ta sa. O le aso e lalaga ai manatu ma fuafua le lumana’i, ina ia tumau pea le soifua solo lelei o le atunu’u.
E le o mapu lou fa’afofoga pea i fa’asalalauga e uiga i le atina’e o le tamaoaiga, le fa’aleleia o a’oga, falema’i, ala tetele, eletise ma le vai taumafa, aemaise le puipuiga o le saogalemu lautele. Tele tapenaga e mo’omia ina ia ofi fimalie mai ma nofo lelei i le atunu’u le atina’e fou o le tamaoaiga, e ala i le faipa opetika (fiber optic). Ona o le a fa’aopoopo tagata ma galuega fou, e ao ai ina fa’aleleia atili alatele, tapena fale ma nofoaga, o le uila ma le vai, sauna a’oga ma le tausiga o le soifua maloloina, ma nofo sauni pisinisi a le atunu’u e tautua ai lenei atina’e tele.
Ua tula’i fo’i lou Malo e tali atu fa’afitau fou o lo tatou soifuaga suia, aemaise le fia lavea’iina o tupulaga talavou mai amioga fa’ati’otala a fili o ona po nei. Aua o tupulaga na o lo tatou fa’amoemoe mo le lumana’I manuia.
O se vaitau tumu i tapenaga lea ua tatou o’o mai i ai. Aepeita’i, e le fa’agalo ai pe fa’atuatuana’i i le misiona taua a le Malo – fa’amautu tulaga e atoatoa ai le puipuia o le sa’olotoga ma aia tatau, ma avatu ai i tagatanu’u uma le tautua mo’omia i le taimi nei, ma le lumana’i.
O le lua lenei o tausaga talu ona taliu mai i fanua le va’asa’ili o Tutuila ma Manu’a, le Komisi Su’esu’e Tulaga fa’aMalo mo le Lumana’i, ma fola i luma o le Fono Faitulafono ma tatou uma lana lipoti. Ua ta’oto atu i le a’ai o finagalo ana fautuaga. O lo’o tatou tali tali malie la se finagalo o le Fono e tusa ma ia sa’iliga. A e fa’apea la’u faitau, atonu o lo’o i ai le finagalo o le Fono e talia le Fono Iloilo Fa’avae, e lalafo ai le atunu’u. A o tatou sauna atu la i le iloiloga, se’i o’u toe fa’amatogi atu vala taua o lo tatou tulaga fa’aMalo, e tapena i ai tofa loloto ma le fa’autaga mamao:
1 O le fesili e tumua: Tatou te tumau ea i le fa’ateritori, e pei ona tatou i ai nei, i lalo o le fa’amalu o le Malo tele? Pe tatou te sa’ili atu e pei ona sa’ili isi fo’i Teritori sa pulea e le Unaite Setete? O lea lava tatou te nonofo ma folafolaga a le Konekeresi ma le Malo Tele, so’o se taimi e mautu ai sa tatou filifiliga, fa’atulaga loa se feutaga’iga. O lo’u aofi, ua o’o i le taimi, e fulifuli fa’ala’au mamafa, liuliu toto’a ai le tofa i se tulaga fa’aMalo mautu. O la’u fautuaga: Aua tatou te nofoa’i. E le taliolaina tulaga ma tofi o le atunu’u. E le fa’atali fo’i galu fafati ma le tai fana’e o suiga se’i o ta malilie. Fa’afofoga fo’I I le alaga a tupulaga o aso nei -- fai se tulaga fa’aMalo mautu.
2 Tu’u ane fo’i lau tofa sa’ili i le fesili i le sitiseni o Amerika Samoa. O le a ea sona tulaga, malosi fa’aletulafono, ma ni aiaiga e ogatasi ma o ta lagona? E le o tatou ea e i ai le aia tatau e fa’asino ai po o ai e avea ma sitiseni o Tutuila ma Manu’a? O le a la le tu’ufa’afeagai ma le sitiseni o le Unaite Setete?
3 E le tau fa’aleoina, pe fa’a’ofu fo’i ni upu, le popolega malosi i taimi uma e lalaga ai nei mataupu. O le fesili muamua a le to’atele: E afaina ai tupe mai le Malo Tele ia e maua mai tausaga uma e fai ai le Malo o Amerika Samoa? E lava le malosi o lou tamaoaiga e fa’atino ail au pule ia te oe lava? Ua e agava’a?
4 O le a lava le tulaga ta te ’ausi i ai, e le tu’umamaina le puipuiga o la ta aganu’u. Tele le faitioina o la ta aganu’u i aso nei. E fa’apogai i le le atoatoa o le malamalama, ma isi uiga ua fa’atino i luga o le igoa o le aganu’u. O la ta fa’aSamoa e le o se aganu’u o teu ma fa’aaliali i pusa tioata o ni fale mata’aga. Leai. O le aganu’u o lo’o ola, ma o lo’o ta soifua ai. E leai fo’i se poto po o se  vave e mafia ona ia faia ni suiga e aunoa ma le talepe ai o le soifuaga fealoa’i masani. A mulu le aganu’u, ua tautalagia le tulaga o matai, ele’ele, gagana Samoa, ma measina.
5 O le a sou lagona i le se’elua o le fa’atemokarasi ma pule’aga e aloa’ia tulaga o le aganu’u, pei ona i ai nei? Alalaga le to’atele ia fa’a’atoa le fa’atemokarasi e ala I le palotaina o le Maota maualuga, ma le vito i ’a’ao o le Fono. Na ta’u i le palotaga o le tausaga ua mavae le finagalo o le atunu’u i le vito. A e toe fa’atata tua’upega le faitioga a le to’atele – fai mai e le’i malamalama.
6 Ua siili le 30 tausaga talu ona palota lo ta kovana. O le a sau fa’alagona ina ua fa’amatu’u mai i ou a’ao ma o ta lima lena vaega o le pule’aga o lo ta’ua lava Malo? Lea ua mulu ’au o foe e au lava tama fanau. Ua mafa tautai fo’i lo ta sa i le poto ma le atamai ua foa’i e le Atua i ou lava tagata.
O ni isi na o fesili, ma isi fo’i e le o fa’aleoina nei, e ono folasia i lumamea pe a iloilo le Fa’avae. E mo’omia se galuega tele e fa’amanino ma fa’apupula le lavelave o nei mataupu. Aua e ese le taia pea i le fa’afofoga, ese le nofo i lalo e va’ili. E le tasi fo’i se iloiloga, pe tasi se tausaga. E le se filifiliga pu’upu’u. O le malaga o maila e afe, e amata i le la’a e tasi. Amata loa. E mafia i le malosi o le Fono Faitulafono ona fa’avae so ta ofisa e iloiloina mae’ae’a, tu’ufa’atasi lipoti uma, tapena feutaga’iga ma le Malo Tele, ma fa’atulaga polokalama o ni a’oa’oga mo le lautele, ina ia filifili ma le manino le lautele.
O novema i le tausaga nei lea ua atofa mo la iloiloga fa’avae. O le 1967 na pasia ai le Fa’avae lea tatou te soifua ai. Ua 42 tausaga. O le aiaiga – ia toe Iloilo i totonu o le lima mai le 1967. Ua fa’alua ona iloilo e le pasia i’uga a le ’au Iloilo. ’Aua ne’i tatou tiu ai. Silasila. Na pasia le fa’avae lenei:
-Sa le atoa le 40,000 le faitau aofa’i o lou Teritori; i le 2009, ua ova ma le 69,000 tagata i Amerika Samoa.
-Sa le atoa se $100 miliona le tupe fa’asoasoa a le Malo i le 1967; i le 2009, ua ova ma le $300 miliona.
-E le i ai lo a Kolisi Tu’ufa’atasi; na o a’oga maualuga e 2.
-E le i ai ni laina u’umi o ta’avale tioata fou i le alatele, ma ni o tatou fale papalagi ta’i fogafale lua.
Na pasia le fa’avae e le i tofu le aiga ma le TV, ma e le i maua i la tatou gagana le komepiuta, initaneti, ma le imeli.
Ioe, e le toe ’alofia le mea ua o’o i lona taimi – toe afua le taeao o lo ta Fa’avae.
O la’u toe upu i le mataupu nei, ia afea o tatou uso mai Samoa i Sisifo o lo’o tatou mafuta, i lou finagalo fuafua. O lo’o alalaga fo’i latou i se faiga mautu e aloa’ia ai lo latou nopia’i ma tautua aiga, tautua lotu, ma tautua malo i o ta ele’ele. E le namalelaina le upu moni, i le taimi nei,ua aga’i atu ina tutusa lo tatou faitau aofa’i – o e na soifua i Samoa, ma tatou na soifua i Tutuila ma Manu’a. E le aga’i fo’i ina fa’aitiitia, ae fa’aopoopo pea, aua o lo’o tatou fa’alagolago malosi ia i latou i le atina’e o le tamaoaiga.
E laga ma le fa’aeteete le mataupu nei, ona e i ai fo’i uso mai isi atunu’u ua usugafa fo’i ma mautu i Tutuila ma Manu’a. A e ao lava ina manino pea, o Upolu ma Savai’i, Tutuila ma Manu’a. o le atunu’u e tasi. Tasi le lanu. Tasi le gagana. Tasi le tupu’aga.
O a’u upu na o lenei Sisigafu’a. Le atunu’u e, mai ou tumutumu mauga e o’o i le lautele, tatou o e laga le tofa ma le fa’autaga o lo’o ’au’afa i maota ma laoa. Tatou o e vala’au i le Papa Fa’avae o lo tatou Fa’atuatuaga. O Ia e fa’aali mai.
Afai e mae’a sauniga ma fa’afiafiaga, a tu’u ifo le Tagavai i lenei tausaga, tatala le filiali’i ma tu’uama le fua – ia soifua i le lagi e mama Tutuila ma Manu’a, folau atu i lagi e lelei le mamalu o le ‘auvala’aulia.
Soifua.