iPacific.com | Samoa | Forum

Author Topic: Flag Day Aso To’ona’i, 17 Aperila 2010  (Read 3840 times)

0 Members and 1 Guest are viewing this topic.

ipacific

  • Administrator
  • Hero Member
  • *****
  • Posts: 395
Flag Day Aso To’ona’i, 17 Aperila 2010
« on: April 20, 2010, 01:15:54 PM »
Flag Day address from Gov. Tulafono

SAUNOAGA
Sisigafu‘a 2010
Kovana Togiola T.A. Tulafono
Aso To’ona’i, 17 Aperila 2010
Malae i Lupelele
Veterans Memorial Stadium
Tafuna, Tutuila, Amerika Samoa
 
 
“O LE A SA‘U MEA O FAI MO A’U LAVA, AE FAI MA O’U SAO MO LO’U MALO?” “O A NI ALA OU TE FESOASOANI AI I LO’U MALO, INA IA FAIGOFIE IA TE IA ONA FESOASOANI MAI IA TE A’U?”
 
E muamua ona ‘ou faatalofa ma faatulou atu i le auau tetele o le taeao mamalu; aso ua ‘ula; taeao sa lupe. E lē o se taeao o le moe ‘ite‘ite ma le ‘apo ‘apo tao, a o le taeao ua fuga ai le ‘oli’oli, a e la‘ei i le matagofie o le Atua. Ua a’e i fanua le vaa na tau mai tai o le ‘au vala’aulia; a’emalō foi lau tiuga Tutuila ma Manua, mai lena Sisigafu’a, e oo mai i lenei. Lea ua tatou ‘aleaga i malae o manū, ma ‘oa ‘oa i le faasoa agalelei a le Tapaau i le Lagi.
 
Faatulou atu i le pa’ia o Sui vaaia o le Atua.
Faatulou ou pa’ia le Faleagafulu ma le Manua Tele.
Faatulou ou mamalu faaleMalo, Amerika Samoa.
Faatulou i le pa’ia ma le mamalu o le ‘au valaaulia:
 
Afioga Le Palemia o le Malo o Samoa – Tuilaepa Lupesoliai Sailele Malielegaoi ma le Faletua;
Afioga i le Perenise o le Malo Tonga – Prince Tungi;
Afioga i le Ulu o Tokelau – Kuresa Nasau
Mamalu o Malo mai le Malo Tele o le Iunaite Setete, Afioga Faleomavaega Eni, ae maise le Department of Homeland Security, FEMA ma le Military; Sui o Ausetalia; Sui o Niu Sila; Malaga faapitoa mai Korea.
 
Ua te’a le inati sa o le Tapaau Tasi.  Ua ta’oto i lāgo lelei upu o le taeao fesilafa’i, i le saunoaga a le Fofoga o le Aso. Ou te lē toe taia la ulugalu pe lūlū fuga o laau.
 
O Aso o Sisigafu’a e toe tepa ai i le savaliga faaMalo, i le va o Sisigafu’a. O se tausaga faigata le 2009. Setema na lūlū ai le mafui’e a e laga le galu fasi tagata. A o Tesema na tapunia ai le Samoa Packing ma aveese atu ai galuega e 1000 ma ona tupu.
 
A e faauta i le alofa o le Atua, o lea ua toe folau malie le sa o Tutuila ma Manua. Faafetai i le aao foa’i o le Malo Tele ma ona lālā eseese; faapea le alofa tula’i o faalapotopotoga, pisinisi, ekalesia, aemaise le mamalu o Samoa o loo ee pāpā aao i fafo.  Faafetai, Faafetai, Faafetai tele.
 
O LOU SAO MO LOU MALO
 
O le limasefulu lenei o tausaga talu ona faate’i e Peresetene Keneti tagatānuu o Amerika i lana lauga o lona faau’uga mo le tofi Peresitene o le Iunaite Setete: “SOIA LE FESILI PO O LE A SE MEA E FAI E LOU MALO MO OE, A E FESILI POO LE A SOU SAO O FAI MO LOU MALO.”
 
I le tusi “Mataala” a Samoana i le 1966, sa ou faatula’i ai lea lu’i i lo’u tofi Peresitene o le A’oga, mo tupulaga a’oa’oina i lea a’oga a le Malo, ona sa ou lagona le taua o le toe faamanatu i a matou auga tupulaga, lea lu’itau, a o aga atu mo le lalolagi tele ma le sailia o se lumana’i. O le taimi lea sa ou matauina ai le tupu tele o le soifua faalagolago i le Malo e faia mea uma lava mo tagata ta’ito’atasi. Ua vaaia le faaitiitia o le soifua atina’e o le tagata, ae ua naunau i le faalagolago i mea e fai e isi mo ia.
 
O le limasefulu tausaga tonu fo’i lenei o le ulua’i faalauiloaina o le tagavai a Amerika Samoa, le fu’a lea sa tusia e le alii faife’au faia’oga o Fareti Sotoa, ma faalauiloa e le ulua’i Samoa na Kovana mo le Malo o Amerika Samoa, Pita Tali Kolumane, i le toe tausaga o lana ulua’i nofoa’iga.
 
O le a le fesoota’iga a ia mea tetele e lua? I a te a’u lava ia, o le lu’i na faatula’i e le Peresitene faau’u, ma mafaufauga atia’e o se tama a’oga 19 tausaga, e fesoota’i i le malosi o le lagona LOTONU’U fiaaoga mo lona atunuu, ae le fia faalagolago e faia mea uma mo ia e lona malo.
 
O le fesili poo iai pea le loto tauivi na faavae ai le Malo; poo ola pea le lotonuu; se’i toe sasaa le fafao a e iloilo le tautua Malo a tagatanuu uma. Poo ua e malie ea i lou sao, lau maa ua lafo mo lou Malo?
 
A ou toe faaupuina, ona faapea lea: “O LE A SA‘U MEA O FAI MO A’U LAVA, A E FAI MA O‘U SAO MO LO’U MALO?” “O A NI ALA OU TE FESOASOANI AI I LO’U MALO, INA IA FAIGOFIE IA TE IA ONA FESOASOANI MAI IA TE A’U?”  
 
O la’u fe’au lena o lenei Sisigafu’a. O mea e te faia mo oe lava ia poo sou uso a tagata i le agaga fesoasoani, o mea fo’i ia ua e faia mo lou Malo. O galuega lelei fo’i e te mafaia i lau lava galuega pool au pisisinisi e tautua a’i ou tagata nuu, o mea fo’i ia ua e faia mo lou Malo. Pe laiti la mea e te mafaia; pe foliga faatauvaa; a e a sa’o ona fai, lelei le faamoemoe na fai ai, ma tini le faamoemoe, e tupu ai se manuia tele.  Mea laiti faapena e tuu faatasi – e fau ai mea tetele.
 
Ua ‘ou toe lagaina le lu’itau a Keneti, ona ua malosi le lagona - ua tatau ona tatou tetee le faalagolago i le Malo i mea uma. Afai e mafai ona tatou faia mea lelei laiti mo tatou lava, aiseā e toe faalagolago ma faatali ai fua i le Malo?
O le lagona mai le porokarama o le Aso Toonai, “Mo Lou Silafia.” Lua vaiaso talu ai na faaseā ai le tasi tinā. Fai mai e iai le paipa e liki i lo latou falea’oga, ua lamatia ai le soifua malōlōina o a latou fanau. Ua fia ma fia tausaga o faatali pea le Malo e lē i o atu lava e fai le paipa. Ua ou ofo! Ofo faanoanoa i ni mātua e mafai ona tuu atu fanau i lenei falea’oga, ma le iloa lelei e lamatia ai latou i ni ma’i faigata, a e lē gaoioi e fō’ia le faafitauli.
E moni o falea’oga e fai e le Malo, a e afai e lē o iloa atu, a tuu lava la e lamatia ai pea fanau? Ua ou manatua ai le tala i le isi alii asiasi a le isi ofisa o le Malo. Uma lelei le tausaga e leai se asiasiga. E su’esu’e atu a e fai mai e pa le pa’u o le taavale lea e alu ai asiasiga, a o lea lava e faatali le OMV e omai e fai le pa’u!
 
A oo le faalagolago i le Malo i le tulaga lena, ua fuamoa le loto fuatiaifo, ua leai se faaaloalo o le tagata i lona lava tāua. Ua sola le mitamita i mea lelei. Faatusa le puni o si paipa pa ma le faiga o le pa’u taavale – i le malosi ma le loto tetele, lotonuu, na mafai ai e o tatou tua’ā ona folau mai i ‘alia laiti i maila e afe ma afe, i vasa e fia, ma taunuu mai i Samoa.
 
O le upu a peresetene Thomas Jefferson, “Ua faatū le malo na te faia mo tagata mea e lē mafai e le tagata ona fai mo ia lava.” Ioe, e sa’o. E fau e le malo falea’oga, falema’i, ala tetele, fale eletise, vai paipa ma isi galuega tatou te lē mafaia ona fai mo tatou lava. A e mafai ona tatou faia le pa’u o le taavale, ma togafiti si mămă o le paipa o le falea’oga. Faigofie ona e aapa e lafo le atigi’apa i le kalone, ma e ‘auai i le sosaiete a Mātua ma Faia’oga. A puipui lou soifua malōlōina, ua faasao miliona e fia a le falema’i. A a’oa’o ma pulea lelei lau fanau – ua faasao isi galuega e tele a leoleo, falema’i, ma isi ofisa e pisi soo ona o tamaiti amio lē pulea.
 
O LE A SA’U MEA E FAI MO LO’U MALO? Manatu i mea laiti. E leai se tau. A e faaaoga ai lou taimi avanoa ma lou malosi. A lelei mo oe – e lelei foi mo lou Malo. E Matagofie mea Laiti. E mauagofie, ma e faigofie ona faaaoga. E lē o se lesona fou. Ua leva ona silafia e le lalolagi atoa – o le tuufaatasia o faatinoga sa’o o mea laiti, e fausia ai mea tetele ma le matagofie. E fau faapena Malo.
 
Ua taia pea i lau faafofoga le upu “tamaoaiga”, ma upu Peretania o le “economy, economize, national economy.” Lea faato’a pupula la tatou vaai i le tāua o le “tamaoaiga” i lo tatou soifuaga, ina ua afaina le tamaoaiga o le Malo atoa o le Unaite Setete. Se’i o’u talanoa atu la i le tāua o mea laiti i le tamaoaiga o le Malo.
 
 Ua tau lē ofi le ala tele i piki ‘apu lapopo’ā, a e tasi pe lua le pasese. O lea ua ‘ou alu e faigaluega i le tele o aso i si tama’i taavale. E ‘ese le manaia. Ia faafofoga:
 
Laitiiti le tau, toe taugofie le tausiga
Laitiiti le kesi e alu ai
Laitiiti le āfāina ai o le ’auala tele
Faigofie ona ’ave, e faaofigofie i soo se paka
Laitiiti le avanoa e lavea ai i se faalavelave faafuase’i.
E lelei mo oe, ae sili ona lelei mo le Malo. Faaa’oa’o ona fai faatasi faatauga o le vaiaso, ae faasao le kesi e fealua’i ai. A ofi uma le aiga i le galuega ma le lotu i le taavale e tasi - tuu le isi.
 
Ua taugata tele le uila. E iai ala e faaitiitia ai le tau. Atonu e fai si taugata i le amataga, a e te lē toe popole i le siisii pea o le eletise. E a pe a faapipii ni nai tioata soulā (solar) i luga o lou fale?
 
E mafai e ni aiga se lima pe ono, poo le nuu atoa foi, ona fau sina vili matagi (windmill) e faatupu ai le eletise mo latou lava. A totoe le paoa e lē uma ona faaaoga, toe faatau mai i le Malo.
 
O loo fai nei sailiilliga e uiga i le laau e maua ai le eletise. A aumai, totō ni au laau. Faaaogā i ai fanua na e lē o faaaogaina.
 
Faaaoga Tatau, Faaaoga Faaeteete
 
Faapē moli, leitiō, TV, ili, A/C, ma soo se mea pe a lē o faaaogaina
Faaa’oa’o ona momoe vave i le po – i se itula se tasi
Faaa’oa’o ona ta’ele i le vai malūlū; faamago mea tatā i le la
Faapē le vai i soo se taimi e uma ai ona faaaoga; puni vave ni mama
 
Mo tagata faigaluega a le Malo, o lea e tumau le poloa’iga: faapepē molī, ili, ma masini eseese pe a manava i afiafi uma.
 
E lē ni aikia fou poo ni galuega mamafa; e leai ni tupe e alu ai. Tau a ina sui teisi  le soifuaga masani. Fesili: O LE A SA’U MEA E FAI MO LO’U MALO? O LE A SO’U SAO I LO’U MALO? Fai nai mea laiti na. E telē le tāua, pe a tatou faia faatasi.
 
Faaaoga le Eleele, o le mea alofa maua fua mai le Atua. Totō ni laau aoga. Fesoasoani i le taumafaiga FAALANUMEAMATA a le lalolagi atoa. O lo tatou olataga lea i le lumuna’i.
 
Totō se fa’i, se esi, ni nai tiapula ma laau fai mea ‘ai. E iai nai o’u laau faapena i le Mauga o Alii. ‘Ese le manaia o le faaaoga o fua o galuega a ou lava lima. E faasao ai foi isi seleni.
 
Fai sau Pisinisi
 
A’oa’o lau su’isu’i, kuka, kamuta, faipaipa, vali fale, ma isi. Pisinisi na ua lolofi mai nei tagata mai fafo e fai, a e tatou nofonofo. E tetele totogi. Fafaga ni manu po o ni mea i tua’olō. E aogā i taumafa ma faalavelave.
 
Atamai Faa’ātisi, Galuega Tau Lima
 
Toe faaiila, pe a’oa’o sau taleni o galuega tau lima ma mea faa’ātisi: Ta faatagata, tusi ata, fai se siapo, lalaga se fala poo se ili ma se ‘ato. E liu seleni pe a omai meli. O ALA LAITI E ATIA’E AI LOU TAMAOIGA, E FAATINO AI FOI LAU TAUTUA MALO.
 
Soifua i se Olaga Puipuia
 
‘Aua le faatupu pisa. Tausi le va lelei ma tuā’oi. Puipui lou soifua maloloina. Ua taugata le falema’i. Tetee fili o le tupulaga: inu pia ma le ulaula laiti, feusua’i laiti, fualaau faasāina, amioga lē taupulea ma le solitulafono.
 
Faape le TV a e faitau sau tusi.
 
Ua ou avatua sina lisi puupuu o mea laiti e mafai ona tatou faia e faalelei atili ai lo tatou soifuaga, a e ālafia ai la tatou fesoasoani i le Malo.
 
Tatou te lē mafaia ona fau ni falea’oga ma ni falema’i – a e mafai ona tapena tamaiti ia saunia lelei mo le a’oga, ma ‘alo’alo ‘ese i mea e ono tutupu ai ma’i. E leai so tatou leo i le tau o le suāuu e ola ai afi o le eletise, ae pule tatou i le faaaogaina o le eletise i ofisa ma pisinisi, aemaise aiga.
O LE A LA SOU SAO MO LE MALO? FAAPEFEA ONA FAATINO LAU TAUTUA MALO?
  
E maua lau tali i mea na ua ou ta’u atu. Tatou fagogota i tai o figota, ma ia lolo’u lou ’ofe, auā si o ta Malo. Faamanuia le Atua i taualumaga o totoe o lenei Sisigafu’a. Manū tatou te mafuta ai, manū tatou te tete’a ai pe tatala le filialii i se taimi o muamua.
 
Soifua.

 


hibiscus iPacific | Samoa | Forum